قسم الطبخ

برياني هندي

برياني هندي:

  • برياني هندي المقادير.
  • أول شي تتبيلة الجاج لكيلو
  • حبتين فليفلة خضرا واذا حبيتو حطوها حارة هية هيك اصولها بس انا ماكان عندي فليفلة حارة فحطيت فليفلة
  • خضرة عادية ومعها ملعقة كبيرة شطة
  • حوالي عشر فصوص توم
  • ملعقتين عصير ليمون
  • نصف كوب لبن
  • ربع كوب زيت نباتي
  • البهارات
  • ملعقة ك كركم
  • ملعقة ك زنجبيل باودر واذا متوفر فريش حطي ملعقة كبيرة زنجبيل فريش مطحون بدل الباودر
  • ملعقة ك كزبرة يابسة مطحونة
  • ملعقة ك بابريكا
  • نصف ملعقة ك كاري
  • للصلصة اللي رح نطبخها عالغاز منحتاج:
  • بصلتين وبندورتين وسط مقطعين جوانح رقيقة
  • ملعقة دبس بندورة
  • ملعقتين سمنة أو زبدة
  • 4 ورق غار
  • عود قرفة
  • فلفل أسود حب
  • هيل حب
  • قرنفل حب
  • نصف ملعقة كمون
  • نصف ملعقة كركم
  • ربع ملعقة كزبرة يابسة
  • لسلق الرز بدنا:
  • كمية وفيرة من المي
  • شوية زيت
  • بهارات صحيحة
  • ملح
  • طريقة التحضير:

أول شي نكون منضفين الجاج وشايلين عنو الجلد ونعمل فيه ثقوب براس السكينة أو بعود خشبي لحتى يتشرب التتبيلة تمام.
نحط كل مكونات التتبيلة بالخلاط ونضربهم سوا ليصيرو ناعمين ونحط الجاجة الحبوبة بالتتبيلة لتتشرب منيح لبين مانجهز باقي المكونات
طبعاً اذا حبيتو عملو هالخطوة قبل بيوم المسويات وتاني يوم بتلاقو الجاجات جاهزين واذا ماعندكم وقت مو مشكلة تعملوها بنفس الوقت بدون ماتضل منقوعة.
هلأ هون نروح للصلصة اللي رح نطبخها عالغاز وعلى نار قوية
نحط السمنة أو الزبدة مع شوية زيت عالنار ونحط البهارات ونحمصها
رح تلاحظو حبات الفلفل بلشت تفرقع وحبات الهيل بلشت تنتفخ
المهم لا تحمصوهم زيادة.
نضيف عليهم البصل ونقلب ليبلش يدبل نضيف البندورة وبعدها دبس البندورة وانتبهو كلو على نار قوية وبدون ملح لأنو مابدنا ننزل مي وهلأ هون نحط قطع الجاج وحدة وحدة مشان مايلحقو. ينزلو مي كمان وبس نخلص إضافة الجاج نصب التتبيلة اللي كان فيها فوقو ونقلب الجاجات وبعدا نغطيهم ونتركهم ليقربو يستوو.
الفكرة من النار القوية وعدم إضافة الملح هو انو الجاج ياخد نكهتو الأولى بدون مي لحتى مايبين كأنو مسلوق
بهالأثناء نصفي الرز البسمتي بعد مانكون نقعناه شوي وصفيناه حوالي 12 دقيقة بكمية كبيرة من الماء مع بهارات صحيحة وشوية زيت وبعدا منصفيه على مصفاية
نجيب طنجرة أو اللي عندها فخارة تستخدمها
أنا فكيت ايدين طنجرتي واستعملتا أصلا عادي مابدها وقفة الشغلة
نحط بالسفل قطع من الجاج وشوية صلصة من اللي طبخنا فيها الجاج وفوق رز وفوق صلصة وكمالة الجاج وقطع صغيييرة من الزبدة وآخر شي كمان رز وفوقو صلصة وشوية زبدة
وبعدا نغلف الطنجرة بالقصدير ومالازم يكون في ولا فتحة لأنو رح نكمل طبخها ببخارها بالفرن فانتبهو تغطوها بالقصدير بشكل محكم
وندخلها الفرن على درجة حرارة 200 نشغل من تحت بس لمدة ثلثين الساعة تقريبا انا هيك اخدت وقت معي
وبعدا نطالعها ونقلبها على جاط وآه من الروايح والجمال والرز المفرفد حبة حبة
رح تكون الزبدة ساحت بين الطبقات والصلصة لونت حبات الرز بدرجات متفاوتة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى